Magtigom ang mga miyembro sa European Broadcasting Union (EBU) aron hisgutan kung tugutan ba ang Israel nga moapil sa Eurovision Song Contest 2026, taliwala sa mga hulga sa boycott sa daghang mga nasud tungod sa nagpadayon nga panagbangi sa Gaza.
Gikatakda nga ipahigayon sa Geneva ang panagtigom, diin maghisgot usab sa mga bag-ong giya nga nagtumong sa pagpugong sa sobra nga pag-promote sa mga entri sa mga gobyerno o ikatulo nga partido, human sa mga alegasyon nga ang Israel dili patas nga nagpataas sa ilang entry karong tuiga.
Sumala sa eksperto sa Eurovision nga si Paul Jordan, ang kompetisyon anaa sa usa ka kritikal nga panahon samtang ang mga pampublikong tigbalita gikan sa Slovenia, Ireland, Spain, ug Netherlands naghulga nga mo-atras kung ang Israel dili tangtangon.
Gipunting sa mga kritiko ang taas nga ihap sa mga namatay sa Gaza, diin kapin sa 70,000, sumala sa lokal nga mga awtoridad sa panglawas, sukad miulbo ang gubat human sa pag-atake sa Hamas niadtong Oktubre 7, 2023.
Kung ang mga miyembro sa EBU dili kombinsido nga ang bag-ong mga lagda igo na aron mapadayon ang neutrality sa kompetisyon, ipaubos sa botohan ang pag-apil sa Israel.
Sumala sa usa ka tinubdan sa industriya, ang Germany mahimong moatras usab ug dili mosibya sa kalihokan kung ang Israel dili tugutan nga moapil.
Apan, ang German broadcaster nga ARD midumili sa pagkomento, samtang ang Austrian host broadcaster nga ORF gusto nga ang Israel makigkompetensya.
Samtang, ang Israeli public broadcaster nga KAN nangandam na alang sa sunod nga kompetisyon ug nagplano nga magpagawas usa ka bag-ong proseso sa pagpili alang sa mga entri niini. Gikatakda usab nga ipahibalo ang posisyon niini bahin sa posible nga diskwalipikasyon.
