Gipangunayan sa Lapu-Lapu City Police Office (LCPO) ug Bureau of Fire Protection Central Visayas (BFP-7) ang tinuig nga inspeksyon sa mga baligyang pabuto ug mga pyrotechnic devices sa dakbayan karong adlaw sa Martes, Disyembre 16, 2025.
Kini isip kabahin sa pagpangandam sa kapulisan karong holiday season diin tradisyon sa mga Pinoy ang pagpabuto matag adlaw sa Pasko ug sa Bag-ong Tuig nga adunay kasikbit nga risgo sa kaluwasan sa tanan.
Giabagan sa Regional Civil Secutiry Unit Central Visayas ang pagsuta sa mga stalls nga legal nga namaligya sa mga firecrackers ug pyrotechnic devices nga nahimutang sa New Road Takan, Barangay Babag sa maong dakbayan.
Anaa ang presensya nila ni LCPO OIC Chief Police Col. Antonietto Cañete, Fire Chief Superintendent Fred Trajeras Jr., ug ni Lapu-lapu City Fire District Marshall Fire Superintendent Arnel Abella ang maong inspeksyon aron siguruon nga nahisubay kini sa fire safety and regulations ang area sa pagpamaligya og pabuto.
Karong adlawa gitugutan ang mga manindahay nga maka-display og makapamaligya na sa ilang mga produkto pipila ka adlaw sa wala pa ang okasyon sa Pasko ug Bag-ong Tuig.
