Gihingusgan sa Police Regional Office 7 ang pagpaningkamot nga makab-ot sa Central Visayas ang malinawon ug mabungahon nga Pasko ug Bag-ong Tuig.
Hinungdan, nga pinangulohan ni PRO-7 Regional Director PBGEN Redrico A Maranan, nagpahigayon sila og mga inspeksyon sa mga pyrotechnic stall sa Lapu-Lapu City ug sa Parmall sa Mandaue City aron mapalambo ang responsable nga paggamit sa mga pabuto ug masiguro ang kaluwasan sa publiko.
Gipahinumdoman sa inspeksyon ang mga tigbaligya og pabuto nga hugot nga mosunod sa mga regulasyon ubos sa Republic Act 7183 ug giawhag ang mga walay lisensya nga tiggama nga himuong legal ang ilang operasyon.
Giawhag usab ang publiko nga likayan ang gidili nga mga pabuto ug mag-amping atol sa kapaskuhan.
Atol sa kalihokan, gipasiugda ni PBGEN Maranan nga ang luwas nga mga selebrasyon usa ka responsibilidad nga giambitan.
Samtang, una na usab nga gipaubos sa Police Regional Office (PRO)-7 ang ilang tanang units sa heightened security posture agi og pagsanong sa Philippine National Police (PNPs) nationwide implementation sa “Ligtas Paskuhan 2025.”
Una niini, nihimo usab og pagsusui ang LCPO OIC Chief Police Col. Antonietto Cañete, Fire Chief Superintendent Fred Trajeras Jr., ug ni Lapu-lapu City Fire District Marshall Fire Superintendent Arnel Abella aron siguruon nga nahisubay kini sa fire safety and regulations ang area sa pagpamaligya og pabuto.
