Human sa duha ka tuig nga walay hunong nga giyera ug pagpabuto, ang gamay nga komunidad sa mga Palestinian Christians sa Gaza nagsugod na sa ilang pagpangandam alang sa ilang unang Pasko nga puno sa paglaum ug kamingaw.
Bisan pa man kon nagpabilin ang mga guba nga panimalay ug mga tinapok nga bato sa tibuok siyudad, makita na ang talagsaong mga talan-awon sa kolor, nagsilak-silak, ug kahayag sa pipila ka dapit, nga matod pa, kini tungod sa nagpadayon nga “ceasefire” nga milungtad na og sobra sa duha ka bulan sukad kini gipatuman.
Alang sa mga nahabilin nga mga Palestinian Christians sa Gaza, ang pagsaulog karong tuiga dili lang usa ka tradisyon, kondili usa ka simbolo sa bag-ong kinabuhi.
Gani, makita ang pipila ka pamilya nga nagdayandayan na og mga Christmas tree ug nagluto og mga kabilin nga pastries o pan isip timaan sa selebrasyon.
Matod pa ni Mousa Ayyad, ang coordinator sa Princess Basma, karong tuiga, ang Pasko dili lang usa ka relihiyosong ritwal, kondili pagsaulog sa usa ka bag-ong sinugdanan nga ang tanan nagtrabaho, nga nagpunting sa bag-ong sinugdanan sa kalinaw ug kalig-on sa rehiyon.
Sa pagkakaron, dako ang panghinaot sa mga lumulupyo nga magpadayon na ang kahapsay aron hingpit na nilang matagamtaman ang tinuod nga diwa sa Pasko uban sa ilang mga pamilya, layo sa hulga sa pag-atake ug kamatayon.
