Nakonektar na sa linya sa Metropolitan Cebu Water District (MCWD) ang mga panimalay sa Sitio National Housing Authority (NHA) ug mga kasikbit nga sitio sa Barangay Busay sa bukirang bahin sa dakbayan sa Sugbo.
Kini human sa kapin tulo ka dekada nga kalisod sa mga lumulupyo sa kinabuhing walay suplay sa masaligang tinubdan sa tubig kay nalinyahan na sila gikan sa nag-unang water distribution company sa syudad niadtong Disyembre 23.
Personal nga mibisita sa maong dapit si Cebu City Mayor Nestor Archival Sr. aron pangulohan ang water commissioning sa mga stub-out connections nga nagserbisyo sa 240 ka mga residente sa maong dapit.
Sumala pa sa MCWD nga adunay kinatibukang 12 ka stub-out na una nang na-instalar sa Sitio NHA ug mga kasikbit nga mga komunidad. Dugang pa niini ang laing unom ka stub-outs na gikatakdang ma-install sa Enero 2026 nga magdalit og koneksyon sa tubig sa 120 ka mga residente lakip na ang mga pamilyang nagpuyo sa dapit isip relocation site.
Mipadayag sa ilang pasalamat nga malibkas na ang ilang kalisod sa suplay sa tubig.
Kahinumduman nga ang maong proyekto unang naglusad sa groundbreaking ceremony niadtong Septiyembre sa pasaad sa kagamhanan nga sulbaron ang kalisod sa tubig sa bukirang barangay.
