CEBU CITY,CEBU- Na-recover na sa Mabolo police station ang motorsiklo nga gikawat gikan sa lalaki nga na aksidente sa MJ Cuenco Avenue, Barangay Banilad sa dakbayan sa Sugbo niadtong Domingo sa kaadlawon, Disyembre 21, 2025.
Didto kini na kuha sa mga pulis sa B. Rodriguez Barangay Sambag 1, sa siyudad sa Sugbo diin gipa-swapan kini sa suspetsado og shabu balor P7,000.
Sa gihimong follow-up operation, nadakpan usab ang suspetsado nga naa na karon sa kustodiya sa Mabolo police station.
Nakuhaan ang insidente sa pagpangawat sa CCTV camera sa establisamento sa dapit nga unang na disgrasya ang biktima sa railings ug natumba.
Gitabang pa kini sa mga naksaksi ug gipahimutang sa kilid sa karsada uban sa iyang motorsiklo.
Pipila ka gutlo ang milabay, dunay lalaki nga miduol sa biktima nga nahinanok sa pagkatulog ug gisakyan ang iyang motorsiklo dayong sibat.
Nag-viral ang maong video hangtod nga dunay naghatag og impormasyon kinsa ang maong lalaki nga naa sa cctv nga mi-resulta sa pagkasikop niini niadtong Martes, Disyembre 23, 2025.
