Gipahibalo ang mahinungdanong kausaban sa eskedyul sa Traslacion para sa umaabot nga Sinulog karong tuiga, diin ang imahe gikatakda nga ibalhin gikan sa Basilica paingon sa dakbayan sa Mandaue karong umaabot Enero 15, adlawng Huwebes.
Human sa “Walk with Mary” sa alas 4 sa kaadlawon, isunod dayon ang Traslacion paingon sa Mandaue diin mopabilin ang balaang imahe didto sugod sa alas 8 sa buntag sa Huwebes hangtod sa alas 4 sa kaadlawon sa Biyernes, Enero 16, sa dili pa ipahigayon ang Misa alang sa pag-send off niini paingon sa Lapu-Lapu City.
Samtang mobiyahe ang imahe paingon sa Birhen sa Regla sa alas 4 sa kaadlawon sa Biyernes ug gilauman nga moabot sa alas 7 o alas 8 sa buntag sa susamang adlaw, diin mopabilin kini didto hangtod sa alas 5 sa kaadlawon sa Sabado, Enero 17, sa dili pa isakay sa galleon alang sa fluvial procession.
Gihikay na usab ang mga deployment plans alang sa seguridad sa tanang mosalmot sa maong mga relihiyosong kalihokan.
Mao kini ang gipasabot ni Rev. Fr. Jules Van Almerez kabahin sa desisyon nga ibalhin ang Walk With Mary gikan sa naandan nga iskedyul, atol na sa pakighinabi niya sa mga sakop sa tigbalita.
Siya niingon nga ang pag-adjust gihimo aron mahatagan ang mga deboto og dugang nga oras sa pagpasidungog ug paggahin og panahon uban sa mga imahen sa Balaang Pamilya.
Dugang niya nga ang gibag-o nga iskedyul ipadapat usab sa mosunod nga mga tuig sa Fiesta Señor.
