CEBU CITY- Gipusil-patay ang usa ka lalaki nga giingong loader pasado alas 9 sa gabii, Enero 11, 2026 sa Borromeo Street Barangay Pahina Central, Cebu City.
Giila ang biktima nga si Lito Formentera, taga Consolacion, ug giingong kasamtangang nagpuyo sa barangay diin siya nagtrabaho isip loader.
Atol sa pakighinabi sa Bombo Radyo Cebu Newseam ngadto sa driver sa dump truck nga si Fernando Amores nga naabot kini sa lugar diin gipusil gumikan magpatimbang unta kini sa ilang mga nakolekta.
Dugang pa ni Amores nga sa wala pa nahitabo ang pagpamusil, iyang gibiaybiay pa ang biktima nga “paldo na” tungod sa mga nakolekta nga mga butang.
Wala magdugay, gipahibalo nalang sila s usa ka e-bike driver nga adunay gipusil sa unahan busa ila kining gisusi ug naabtan nalang nila ang biktima nga naghigda ug wala nay kinabuhi.
Basi usab sa inisyal nga impormasyon, ang biktima nakaangkon og tulo ka bala, diin tanan anaa sa ulo.
Sa pagkakaron, padayon pa ang gihimo nga imbistigasyon sa mga otoridad aron sa pagtumbok usab sa suspek sa pagpamusil.
