Gikumpirma sa mga otoridad ang kamatayon sa walo (8) ka mga empleyado, samtang 28 pa ang padayong gipangita, human sa usa ka makalilisang nga pagdahili sa Binaliw Prime Waste landfill niadtong Huwebes sa hapon, Enero 8, 2026.
Sa kinatibuk-ang 110 ka empleyado nga anaa sa sulod sa pasilidad sa dihang nahitabo ang trahedya, 12 ka mga biktima ang swerteng naluwas apan nakaangkon og mga samad.
Samtang sa pagkakaron, pito (7) sa mga naluwas ang giatiman sa VisayasMed (VISMED), samtang lima (5) usab ang gidala sa North General Hospital (NORTHGEN) aron matambalan.
Kini ang gikompirmar ni SFO3 Wendell Villanueva, Cebu City Fire Office Spokersperson atol sa ekslusibong pakighinabi sa Bombo Radyo Cebu Newsteam kaniya, diin matod niya,nanghinaot siya nga sa dul-an upat ka adlaw ang milabay human nahitabo ang insidente, naa gihapon silay maluwas nga buhi, busa subsob gihapon kaayo ang ilahang search and rescue operations, ug dili pa search and retrieval operations.
Giklaro usab ni Villanueva nga sa kasamtangang operasyon sa sakop sa Bureau of Fire Protection, nag-focus sa debris clearing gamit ang mga heavy equipment aron masiguro ang siguridad ug access, ug sa higayon nga hingpit na matuldokan ang maong operasyon, padayon na usab sila sa search and rescue.
Giila na usab ang mga biktima nga nakabsan sa kinabuhi nga sila si Jhea Jayme Librando gikan sa Badian; James Andrino sa Sapangdaku, Cebu City; Rowena Randino; ug John Paul Apilan sa Apas, Cebu City, Jane Haymor Tubod sa Panoypoy, Consolacion; Armi Leah Labos sa Inayawan, Cebu City; Padilla Luz sa Consolacion; ug Gemma Apas nga lumad gikan sa lungsod sa Consolacion, diin naghatag kini og dakong kaguol sa mga pamilya ug komunidad nga naapektuhan niini nga panghitabo.
Sa pagkakaron, nagpadayon pa usab ang gihimong search and rescue operations sa mga ubang rescue teams sa tinguha nga makit-an pa ang 28 ka mga missing nga trabahante ilalom sa nagtipun-og nga yuta ug basura.
Nagpabilin usab nga naka-alerto ang mga lokal nga opisyal samtang ginasusi pa ang kinatibuk-ang danyos ug ang hinungdan sa maong pagdahili sa nahisgutang landfill.
