Pormal usang ibahin ang operasyon sa Cebu South Bus Terminal (CSBT) ngadto sa South Road Properties (SRP) ning dakbayan sa Sugbo para sa preparasyon karong Sinulog weekend.
Kini ang gipahibalo sa Kagamhanang Lalawigan sa Sugbo nga maoy tigdumala sa bus terminal diin ang temporaryong pagbalhin sa operasyon maglangkob lang sa adlaw nga Sabado (Enero 17) ug Dominggo (Enero 18).
Nahisubay kini sa paghatag og lugar sa tinuig nga Solemn Foot Procession para sa Sr. Sto. Niño de Cebu ug sa Sinulog Street Parade diin ang dalan N. Bacalso Ave. kay gamiton ingon man sa paglibkas sa epekto niini sa dagan sa trapiko sulod sa mga nahisgutang adlaw.
Nahimutang ang designated arrival point sa mga pasahero gikan sa habagatang Sugbo sa Il Corso Terminal sa SRP diin didto aduna nay mga modern jeeps nga masakyan padulong sa city proper sa regular nga plitehan sa mga destinasyon sa Cebu North Bus Terminal, Plaza Independencia, dalan Katipunan (atubangan sa Bible Baptist Church), Kinasang-an via dalan F. Vestil, ug Cordova via CCLEX.
Samtang ang mga mubyahe padulong sa habagatang probinsya gikan sa syudad kay gi-abisohan nga muadto sa dalan Katipunan diin ang mga modern jeep mangagi sa kasamtanang transfer of operation sa CSBT.
Adunay 24 ka mga bus loading stations nga ipahimutang para sa mga byahe sa nagkadaiyang dapit lakip ang ticketing counters, traffic enforcers, ug peacekeeping personel sa temporary bus terminal sa SRP diin aduna pa kiniy tents, kalingkuran, portalets ug uban pa.
Ingon man nga ang mga byahe sa Van-for-hire units padulong sa Simala, Moalboal, Toledo, ug Pinamungajan kay didto ra ipahimutang sa bag-ong V-hire Terminal duol sa Sanciangko Bridge kilid sa Barangay Hall sa Pahina Central.
Sa adlawng Sabado ug Dominggo, magsilbi ang CSBT compund nga parking area sa mga sakyanan sa emergency responder, law enforcers, ug Sinulog working committee members.
Mubalik ang normal nga operasyon niini liwas na sa adlaw sa Sinulog sa Lunes, Enero 19.
