Nagmalampuson ang nahikay nga unang Traslacion sa imahen nilang Our Lady of Guadalupe de Cebu ug sa Señor Sto Niño de Cebu kaganihang buntag ron Huwebes, Enero 15 padulong sa dakbayan sa Mandaue.
Ang maong Traslacion kay kabahin sa major religious activities sa ika-461 Fiesta Señor diin gikan sa Basilica Minore del Sto. Niño de Cebu baklay padulong sa National Shrine of St. Joseph.
Giubanan sa mga opisyal sa simbahan sa Basilica ug sa kagamhanang dakbayan sa Mandaue ug Sugbo ang maong Traslacion diin ang panagtagbo sa mga opisyales nahitabo sa utlanan sa Mabolo ug Subangdaku sa presensya nilang Cebu City Mayor Nestor Archival ug Mandaue City Mayor Thadeo “Jonkie” Ouano.
Giatangan sa mga deboto ang maong Traslacion diin nakita sa mga kadalanan nga giagian ang ilang pagpundok, pag-atang, ug pagpanampalataya sa pagbahis sa carroza sa duha ka imahen.
Milanat sa kapin tulo ka oras ang maong Traslacion diin ang mga imahen kay magpabilin sa simbahan sa Mandaue tibuok gabii karong adlawa ingon man sa gitakda pud niining Traslacion ugmang adlawa sa Biyernes, Enero 16 padulong sa dakbayan sa Lapu-lapu sa Nuestra Señora Virgen dela Regla isip preparasyon na sab sa umaabot Fluvial procession inig Sabado, Enero 17.
