Gi-republish sa Federal Bureau of Investigation (FBI) sa social media ang listahan sa “Most Wanted” sa human trafficking nga naglakip sa founder sa Kingdom of Jesus Christ (KOJC) nga si Pastor Apollo Quiboloy ug duha pa ka miyembro sa sekta.
Sa giisyu nga notice sa FBI Dallas, si Quiboloy usa sa mga indibidwal nga anaa sa Most Wanted list uban sa duha pa ka kauban, sila si Teresita Tolibas Dandan ug Helen Panilag.
Dinhi, sila si Quiboloy, Dandan ug Panilag giklasipikar nga mga pugante nga giakusahan sa dugay na nga human trafficking scheme.
Nanawagan ang bureau sa bisan kinsa nga adunay impormasyon bahin sa nahisgutang mga indibidwal nga motawag sa 1-800-CALL-FBI, ingon man nga motawag sa pinakaduol nga embahada o konsulado sa Amerika o mosumiter og tip online.
Ang Embahador sa Pilipinas sa US nga si Jose Manuel Romualdez sa sayo pa miingon sa miaging tuig nga adunay hangyo sa extradition alang kang Quiboloy apan ang Department of Foreign Affairs (DFA) naghulat pa sa pormal nga note verbale. Matod pa sa envoy nga naa ra sa Department of Justice ang desisyon kung tugutan ba nila si Quiboloy nga ma-extradite sa US bisan pa sa iyang mga kaso nga nag-ung-ong dinhi sa Pilipinas.
