Nagpadangat og 30 ka tonelada nga humanitarian aid ang kagamhanan sa India alang sa mga probinsya nga grabeng naapektuhan sa mga linog ug makamatay nga mga bagyo nga miigo sa nasud sa miaging tuig.
Personal nga gitunol ni Indian Ambassador to the Philippines Shri Harsh Kumar Jain ang maong tabang ngadto kang Department of Social Welfare and Development (DSWD) Undersecretary Diana Rose Cajipe atol sa usa ka seremonya sa Clark Air Base niadtong Martes, Enero 20.
Ang maong hinabang naglakip sa 6.5 tonelada nga mga importanteng tambal ug medical equipment, ingon man mga dignity kits, sleeping mats, heavy-duty tarpaulins, ug mga materyales alang sa temporaryong puy-anan.
Usa sa mga highlight sa donasyon mao ang BHISHM (Bharat Health Initiative for Sahyog, Hita, and Maitri) Cube, usa ka portable hospital nga daling ma-deploy aron makahatag og dinaliang medical care ug on-site nga mga operasyon panahon sa katalagman, sumala pa sa pamahayag sa Indian Embassy.
Gisakay ang maong mga ayuda sa usa ka Indian Air Force C-17 Globemaster III aircraft niadtong Lunes, usa ka bulan human gidawat sa gobyerno sa Pilipinas ang tanyag nga tabang gikan sa India.
Matud sa Indian Embassy, ang maong donasyon nakig-alayon pag-ayo sa mga ahensya sa gobyerno sa Pilipinas aron masiguro nga kini sibu sa mga panginahanglanon ug prayoridad sa nasud.
Kahinumduman nga ang Pilipinas giigo sa duha ka kusog nga linog sa ulahing bahin sa 2025, nga nikalas og daghang kinabuhi ug nagbilin og binilyon ka pesos nga danyos sa imprastraktura sa Sugbo ug Mindanao.
Gawas niini, nakasinati usab ang nasud og grabeng pagkagun-ob tungod sa sunod-sunod nga mga bagyo, lakip na ang Bagyong Tino ug Super Typhoon Uwan.
Susamang gipadayag ni Jain nga ang India nagpabiling lig-on sa pagpakig-alayon sa mga Pilipino ug naglaum nga kining maong tabang makatabang sa mga apektadong komunidad aron makabangon.
Dugang pa niya, ang India magpadayon sa paggiya sa ilang panan-awon nga “Mutual and Holistic Advancement of Security and Growth for All in the Region” (MAHASAGAR) ug magpabiling “first responder” sa paghatag og dinaliang humanitarian assistance ug disaster relief sa tibuok rehiyon sa Indo-Pacific.
