Gipasalig sa Department of Education (DepEd) niadtong Martes ang pagpanguna sa pagpatuman sa roadmap sa Second Congressional Commission on Education (EDCOM 2) subay sa Final Report niini nga, “Turning Point: A Decade of Necessary Reforms (2026-2035).”
Sa usa ka pamahayag, giingon ni DepEd Secretary Sonny Angara nga ang uban sa mga rekomendasyon nahimo nang kabahin sa nagpadayong reporma sa ahensya ubos sa mando ni Presidente Ferdinand R. Marcos Jr. Sumala pa kaniya, daghan sa mga rekomendasyon ang gisugdan na sa DepEd, ug ang ilang gihimo karon mao ang pagpadali, pagpalapad, ug pagpahugot sa tulubagon sa matag usa.
Lakip sa mga prayoridad nga dapit mao ang learning recovery, foundational skills, ug system-wide governance reforms. Gipasiugdahan usab ni Angara ang panginahanglan sa “whole-of-nation approach” o pagtinabangay sa tibuok nasod, lakip na ang mga lokal nga kagamhanan, mga ginikanan, ug uban pang stakeholders aron masulbad ang mga hagit sa sektor sa edukasyon.
Gipahugtan na karon sa DepEd ang early learning pinaagi sa pag-usa sa curriculum ug pagbansay sa mga magtutudlo. Alang sa academic year 2026-2027, palapdan usab ang feeding programs ug parent engagement programs. Gipatuman na usab ang revised K-10 curriculum duyog sa pagpakunhod sa administrative workload sa mga magtutudlo aron mas maka-focus sila sa pagtudlo.
Dugang pa, gipakusgan sa ahensya ang digitalisasyon, pagpaayo sa Alternative Learning System (ALS), ug ang pakig-alayon sa CHED ug TESDA. Aron masulbad ang kakuwang sa lawak-sabituran, gipaspasan ang procurement ug public-private partnerships (PPP) diin gilauman ang dungan nga pagpamukod sa mga tunghaan sa unang quarter sa 2027.
