Niluwat og kamandoan ang Department of the Interior and Local Government (DILG) kabahin sa pagpatuman sa “Anti-Epal” policy sa tibuok nasud aron tangtangon ang mga ngalan ug hulagway sa mga opisyal gikan sa mga proyekto sa gobyerno.
Kini nga polisya nagsubay sa DILG Memorandum Circular No. 2026-006, diin kini naglangkob sa pagdili pagbutang og ngalan, litrato, logo, inisyal, color motif, o slogan sa mga politiko sa bisan unsang signage, marker, o tarpaulin sa mga proyekto nga gipundohan sa katawhan, ug kini ipahamtang sa tanang opisyal sa probinsya, siyudad, lungsod, hangtod sa barangay, lakip na ang mga attached agencies sa DILG.
Subay niini, ekslusibong gikab-ot sa Bombo Radyo Cenu Newsteam ang habig ni Danilo Arao, ang convenor sa Kontra Daya, diin matod niya, ang “Anti-Epal” policy hagbay ra “unta” kini nga ipatuman, ug maayo lang nga sa karon, hingpit na gayud kining mapatuman sa lebel sa mga Local Government Unit (LGU).
Apan, gidugang ni Arao nga mas maayo og dili lang kini “applicable” sa LGU lang, ug mas maayo nga sa tanang proyekto sa gobyerno, sa executive branch sa nasyonal nga lebel, malakip niini nga polisiya.
Alang usab ni Arao, ang nagpaluyong rason nganung adunay mga elected officials nga magbutang sa ilahang mga pangan o uban pang timailhan sa ilang proyekto sa ilang nagkadaiyang LGU kay mao ang pagpangompanya.
Gihimug-atan niya nga rason nganung moladlad ang mga opisyales sa ilang mga hulagway ug uban pa kay aron mohumot o mailhan sila sa adlawng piniliay, aron ipa gawas nga aduna silay nahimong nagkalain-laing proyekto sa partikular na LGU.
