Mipahayag si Consolacion Municipal Mayor Teresa “Nene” Alegado nga ang ubang local government units (LGUs) sa Metro Cebu kay wala una nakig-koordinar sa munisipyo sa lungsod sa ilang temporaryong paglabay sa ilang basura sa pasilidad sa Asian Energy sa Barangay Polog human sa makalilisang nga landslide accident sa Binaliw niadtong Enero 8, 2026.
Sa pakighinabi sa mga sakop sa tigbalita ni Mayor Alegado, gisaysay niini nga ang lokal nga kagamhanang sa mga dakbayan sa Sugbo ug Mandaue kay wala nakigkoordinar sa munisipyo sa Consolacion ilabi na ang mga truck sa basura kay hasta ka dagko nga makamugna og problema sa duot sa trapiko, mangatagak-tagak nga karga, ug pagkaguba sa mga gagmayng municipal interior road padulong sa pasilidad.
Dugang sa mayor nga nanukad ang iyang pamahayag nunot sa reklamo sa iyang mga konstituwente sa Barangay Polog ug mga kasikbit nga lugar hinungdan nga nagsugyot kini og kolaborasyon aron dungan sulbaron ang suliran sa basura human sa pagkabalda sa operasyon sa Binaliw landfill.
Ingon man nga gibutyag sab ni Mayor Alegado ang guidelines sa pag-transport ug pag-dispose sa mga basura gikan sa dakbayan sa Sugbo, Mandaue ug sa Lapu-Lapu aron hapsay ang pagdala niini padulong sa pasilidad.
Gilatid pud niini nga ang Asian Energy landfill kay aduna lay kapasidad sa 500-600 ka tonelada sa basura kada adlaw nga madawat kun diin kung mulapas pa kay maglisod na sa pag-akomodar ang pasilidad sa gidaghanon.
Gibahin niini niya ang alokasyon sa matag LGUs sa 100-150 ka tonelada tungod kay ang mugna lamang sa lungsod kay anaa sa 85 ka tonelada subay sa ilang komputasyon ug ang operasyon kay gibahin sab sa buntag kay sa mga LGUs samtang ang hapon kay sa mga pribadong kumpanya gikan sa alas 8 sa buntag hangtod alas 5 sa hapon.
