Gihingusgan sa Kagamhanang Lalawigan sa Sugbo ang preparasyon niini alang sa posibleng kadaot nga mugna sa Tropical Strom BASYANG.
Sa ilang pagpangandam, ang mgatrabahante sa Kapitolyo kay nagsugod na og pamundo sa ilang large-scale packaging operations alang sa mga family food packs, hygiene kits, sleeping kits, ug kitchen kits sa Capitol Warehouse.
Nagtambayayong niini ang mga personahe gikan sa Provincial General Services Office, Provincial Social Welfare and Development Office, ug sa Cebu People’s Action Center aron ang mga relief goods kay andam para sa hinadaling pag-apod-apod sa mga komunidad nga maapektohan sa bagyo.
Sa pinakaulahing datos, ang Kapitolyo kay nakaandam na og 1,300 ka family food packs, 1,200 ka hygiene kits, 3,500 ka sleeping kits, ug 1,500 ka kitchen kits.
Padayon ang Kapitolyo sa Sugbo sa pagpalig-on sa kaandam niini aron masigurong organisado ug paspas ang tabang nga sangpiton sa mga Sugbuanon karong adunay bagyo nga muigo sa probinsya.
