Gipasalig ni Mayor Nestor Archival sa publiko nga ang kagamhanan sa Dakbayan sa Sugbo nagpabiling anaa sa full alert status samtang ang walay hunong nga ulan tungod sa shear line nagpahinabog ginagmay nga baha ug pagdahili sa yuta sa pipila ka barangay sa kabukiran.
Matod sa Mayor, base sa pinakaulahing assessment, walay dagkong landslide nga natala, apan adunay mga localized incidents sa Budlaan, Mabini, ug Pulang Dako diin dunay mga punoan sa kahoy nga nangatumba ug nidaot sa pipila ka balay.
Tungod niini, paspas nga gilihok ang mga disaster response units aron mopahigayon og clearing operations, pumping activities, ug damage assessments sa mga dapit nga apektado.
Gipahimutang na usab ang mga apektadong residente ngadto sa mga evacuation area isip precautionary measure, samtang gipadala ang mga heavy equipment sa Barangay Mabini human mamatikdi ang paglihok sa yuta sa pipila ka bahin niini.
Gipahingusgan ni Mayor Archival nga ang mga opisyal sa barangay kinahanglan mosunod sa standard operating procedures, ilabi na ang pagpatuman og preemptive evacuation kon gikinahanglan.
Andam ang kagamhanan sa dakbayan sa paghatag og dugang logistical support sama sa pagkaon ug kagamitan alang sa mga dapit nga nameligro.
Sa laing bahin, gikompirma sa Mayor nga ang mga proyekto sa gabion dam nalakip na sa mga programa sa gobyerno alang sa pagpugong sa baha.
Gihatagan niya og gibug-aton ang importansya sa pagpahigayon og saktong technical studies aron matino ang saktong lokasyon niining mga istruktura.
Subay niini, usa ka technical working group ang naumol na kaniadto aron ilhon ang mga prayoridad nga dapit base sa scientific ug environmental nga pagtuon aron maseguro ang kaluwasan sa publiko sa dugay nga panahon.
