Walay direktang komento si Ferdinand Marcos Jr. bahin sa naglutaw nga posibilidad sa “Sara–Imee” tandem alang sa 2028 elections, ingon man sa gisugyot nga “Leni–Risa” duo.
Kini subay sa pag-anunsyo ni Sara Duterte sa iyang plano nga modagan isip presidente sa 2028.
Sa dihang gipangutana kabahin niini, mitubag lamang si Marcos og, “Good luck.”
Sumala ni Palace Press Officer Undersecretary Claire Castro, naka-focus ang Presidente sa iyang trabaho isip chief executive ug dili gusto nga maghisgot og mga isyung politikal, ilabi na kay layo pa ang sunod nga eleksyon.
Gihimakak usab sa Malacañang ang espekulasyon nga ang administrasyon nangulitawo kang Leni Robredo,kanhi Bise Presidente ug karon Mayor sa Naga City, alang sa 2028 presidential elections.
Matod pa ni Castro, wala maghisgot o naghimo og bisan unsang lakang ang administrasyon sa pagpili og kandidato alang sa sunod nga eleksyon.
Dugang niya, mas nakatutok ang Presidente sa pagsulbad sa mga problema sa baha ug pagpalig-on sa ekonomiya kaysa paghisgot sa politika.
