TOLEDO CITY, CEBU- Nasikop na sa mga sakop sa kapulisan ang gitudlong suspek sa pagpatay sa usa ka 12-anyos nga batang babaye, kansang lawas nakit-an sa usa ka hilit nga dapit sa utlanan sa Barangay Ibo ug Barangay Cabitoonan sa Dakbayan sa Toledo niadtong Miyerkules, Pebrero 19, 2026.
Gikataho nga ang suspek usa ka paryente sa biktima. Nadakpan kini atol sa gipahigayong follow-up operation sa kapulisan ug sa pagkakaron gitanggong na sa Toledo Police Station.
Base sa inisyal nga imbestigasyon, positibong giila sa mga saksi ang suspek nga maoy katapusang nakita nga kauban sa biktima niadtong Pebrero 11, 2026, sa samang adlaw nga gikatahong nawala ang bata.
Gikumpirma usab sa mga imbestigador ang presensya sa CCTV footage nga nagpakita sa suspek nga nagmaneho og motorsiklo uban ang biktima nga iyang angkas sa adlaw nga nawala kini.
Matod pa sa kapulisan, dako kini’g natabang sa pagpalig-on sa kaso batok sa suspetsado.
Sumala sa mga awtoridad, ang biktima usa ka Grade 6 nga estudyante sa usa ka pampublikong eskwelahan sa Toledo.
Padayon pa sa karon ang lawom nga imbestigasyon sa kapulisan samtang giandam ang pagpasaka sa angayng mga kasong kriminal batok sa suspek.
Lakip sa ilang gisusi ang posibilidad nga adunay nahitabong sekswal nga pag-abuso sa wala pa ang krimen.
