LAPU-LAPU CITY, CEBU- Kusganong gipanghimakak sa kampo ni Cezarsh “Sarah” Discaya, tag-iya sa Alpha and Omega Construction, ang ilang koneksyon sa St. Timothy Construction sa pre-trial hearing sa kaso sa malversation of public funds pinaagi sa falsification, nga gihimo sa Regional Trial Court Branch 27 sa Lapu-Lapu City, gahapon, Pebrero 27, 2026.
Uban ni Discaya ang walo ka mga engineer ug sakop sa Department of Public Works and Highways (DPWH) Region XI – Davao Occidental Engineering District, nga gipresentar sa ilang mga abogado.
Lakip sa mga kauban ni Discaya nga akusado mao si Ma. Roma Romando, Presidente sa St. Timothy Construction; Rodrigo Larete, District Engineer; Michael Awa, Assistant District Engineer; ug uban pang mga engineer sa DPWH Region XI.
Ang kaso may kalabotan sa ₱96.5 milyones nga revetment bank flood control project sa Barangay Kulaman, nga gitino sa Office of the Ombudsman isip usa ka ghost project.
Atol sa hearing, gipresentar sa prosekusyon ang stipulations of facts nga giandam sa Office of the Ombudsman batok kang Discaya.
Sentro sa kaso ang giingong koneksyon ni Discaya sa St. Gerard Construction, ang kompanyang nakadaug sa ₱92.5 milyones nga kontrata alang sa flood control project sa maong barangay.
Apan kusganong gipanghimakak sa kampo ni Discaya ang mao nga alegasyon, nga nagpahayag nga si Sarah Discaya mismo ang bug-os nga nanag-iya sa Alpha and Omega Construction.
Gihisgutan usab ang paggamit sa project coordinates isip exhibit sa umaabot nga mga hearing.
Nahimong isyu ang discrepancy sa coordinates nga gipakita sa website sa sumbong ug sa mga dokumentong gisumite sa DPWH, nga gamiton sa prosekusyon isip basehan sa satellite imaging nga ebidensiya.
Misupak si Atty. Paul Tristan Sato, abogado sa uban pang DPWH Engineers, nga dili usa ka ghost project ang ₱92.5 milyones nga flood control project ug klaro nga makita sa aktuwal nga lokasyon.
Gikatakda nga magpadayon sa Marso 10 ang sunod nga pre-trial hearing sa maong kaso.|With reports of Bombo Rexmond Omega
