Gibutyag ni Senador Panfilo Ping Lacson, Chairman sa Senate Blue Ribbon Committee, nga walay usa ka mastermind luyo sa kaylap nga mga anomaliya sa pondo sa mga flood control projects, apan mismo ang mga opisyal sa nagkalain-laing sanga sa Department of Public Works and Highways (DPWH).
Basi sa pagtuki sa senador, ang korapsyon gidumala sa mga organisadong grupo nga nakabase sa matag rehiyonal ug distrito nga opisina sa ahensya, ug sila mismo ang boluntaryong nagpadagan sa mga iregularidad sa ilang tagsatagsa ka hurisdiksyon.
Giinsistir ni Lacson nga imposible nga usa ra ka tawo ang magmando sa tanang regional directors ug bisan sa kalihim mismo sa DPWH nga mohimo sa pagpangawat.
Subay niini, isumiter sa Senate Blue Ribbon Committee ngadto sa Office of the Ombudsman ug sa Department of Justice (DOJ) ang tanang ebidensya nga ilang natigom kalabot sa ilang imbestigasyon, human sa presentasyon sa report sa plenaryo sa Senado.
Sumala ni Lacson, usa ka transmittal letter ang giandam aron pormal nga mahatag sa mga awtoridad ang tanan nilang ebidensya, lakip na ang mga dokumento, testimonya, ug bisan ang mga transcript sa stenographic notes o TSN.
Gipasabot sa senador nga iyang gipublikar ang bahin sa report pinaagi sa usa ka privilege speech aron magamit sa mga awtoridad ang mga dokumento nga dili makalapas sa mga lagda sa Senado.
Ang gipagawas nga partial committee report adunay sulod nga reporma ug referral package nga nagtumong sa pagpalig-on sa mga gahum sa Ombudsman ug DOJ.
