Masaligon ang Deputy Prosecutor sa International Criminal Court (ICC) nga ang mga crimes against humanity charges batok kang kanhi Presidente Rodrigo Duterte magpadayon sa hingpit nga husay.
Kini human sa pagtapos sa upat ka adlaw nga pagdungog sa pagkumpirmar sa kaso sa kanhi Presidente sa ICC Pre-Trial Chamber I.
Sumala ni Deputy Prosecutor Mame Mandiaye Niang, ang ilang habig nakapresentar og ebidensya ug kadaghanan niini may kalabotan sa mga pakigpulong gikan mismo sa kanhi Presidente.
Gipasabot sa Deputy Prosecutor nga alang sa pagkumpirma sa kaso, kinahanglan lang nila nga maghatag og igong basehan sa pagtuo ug miinsistir nga kini wala pa kabahin sa trial.
Gipadayon usab sa ICC Prosecutor nga adunay igong ebidensya aron motuo nga ang ilang giakusahan sa kanhi Presidente makatarunganon ug dili usa ka huyang nga akusasyon.
Gipunting usab ni Niang nga ang kaso batok sa kanhi Presidente kinahanglan nga ipadayon sa husay bisan pa sa pagkuwestiyon sa depensa sa kredibilidad sa mga saksi o sa ilang mga kalainan, usa ka butang nga dili angay ikonsiderar sa mga maghuhukom sa ICC.
Gipasabot usab sa Deputy Prosecutor nga ang mga saksi wala pa gipailalom sa cross-examination, tungod kay kini himuon lamang atol sa husay mismo.
Samtang, sa bahin sa depensa, ang abogado nga si Nicholas Kaufman nagpahibalo nga nagtuo siya nga ang mga huwes sa ICC Pre-Trial Chamber I modesisyon basi sa ebidensya.
