Opisyal nang nadawat sa usa ka Sugboanon ang iyang ganti nga ₱1,000,000 cash human siya gideklarar nga grand prize winner sa One Two Panalo Promo atol sa awarding ceremony nga gipahigayon karong Lunes, Marso 2, 2026.
Ang maong swerteng mananaog mao si Lina Tomaquin, 48-anyos ug residente sa San Isidro, dakbayan sa Talisay, Cebu.
Siya ang ika-76 nga milyonaryo sa Bombo Millionaires Club ug nangulo sa mga masuwerteng indibidwal nga personal nga nikuha sa ilang mga premyo.
Sumala pa ni Tomaquin, ang iyang nadag-ang kantidad itagana niya alang sa matrikula sa iyang anak ug isip puhunan sa patigayon nga iyang pagatukoron.
Dugang pa niya, unom na ka tuig siyang makanunayong misalmot sa mga promo sa Bombo Radyo Cebu, hinungdan nga hilabihan ang iyang kalipay nga sa katapusan, siya na gayod ang napiling makadawat sa maayong grasya nga usa ka milyon ka pesos.
Ang maong awarding ceremony dungan nga gipahigayon sa 32 ka mga istasyon sa Bombo Radyo Philippines ug Star FM sa tibuok nasod.
Kahinumduman nga ang grand draw sa maong promo gipahigayon niadtong Disyembre 27, 2025.
