Nasayran nga mabdos si Mary Anne Velasquez de Vera, usa ka 32-anyos nga Pinay caregiver, nga namatay human sa pag-atake sa missile sa Iran sa Israel.
Kini sumala sa iyang mga miaging amo, sila si Barbara Wachspress ug Janice Prawer, nga maoy iyang unang gi-serbisyuhan sa dihang miabot siya sa Tel Aviv.
Espesyal kaayo alang kanila si Mary Anne, nga ilang gihulagway isip usa ka “angel on Earth.”
Gibutyag usab nila nga ang batan-ong babaye, nga naminyo og kapwa Pilipino duha ka tuig na ang milabay, mabdos sa ilang unang anak sa dihang siya namatay sa Israel taliwala sa nagpadayon nga tensyon tali sa Iran ug Israel.
Sumala sa Embahada sa Israel sa Manila, siya nasamdan samtang walay pagduha-duha nga nagtabang sa iyang pasyente aron masiguro ang kaluwasan niini atol sa Iranian missile attack.
Si Velasquez de Vera nakit-an nga anaa sa kritikal nga kondisyon human ang usa ka ballistic missile miigo duol sa usa ka apartment building sa coastal city.
Gideklarar siya nga patay na sa mga paramedik samtang gidala dayon sa ospital, diin siya giila sa iyang bana.
