Nakatala ang Department of Migrant Workers (DMW) og dili mominos sa 80 ka mga overseas Filipino workers (OFWs) sa Dubai nga mipadayag sa ilang intensyon nga makauli sa Pilipinas taliwala sa nagpadayong tensyon sa Middle East.
Gibutyag kini ni DMW Region 7 Assistant Regional Director Atty. Rex Tadena nga nagkagrabe nga panagbangi nga naglakip sa United States, Israel, ug Iran miresulta sa lapad nga airspace closures ug flight suspensions sa pipila ka bahin sa Middle East. Kini ang hinungdan sa pagkadisturbo sa international airline operations nga nakapugong sa dinaliang repatriation sa daghang mga Pilipino.
Ubos sa kasamtangang alert classifications nga gi-issue sa Department of Foreign Affairs (DFA), ang mga nasud sama sa United Arab Emirates, Kuwait, Qatar, Bahrain, Saudi Arabia, ug Israel anaa karon sa Alert Level 2 (travel restrictions), samtang ang Lebanon nagpabilin ubos sa Alert Level 3 (voluntary repatriation).
Sanglit apektado pa gihapon ang mga airports ug airspace, padayon nga naghatag og ayuda ang gobyerno sa Pilipinas ngadto sa mga OFWs pinaagi sa pag-provide og shelter, pagkaon, ug in-country evacuation support, samtang nangandam alang sa ilang repatriation sa higayon nga mabalik na ang luwas nga travel conditions.
