Gipasalig sa Kagamhanang Lalawigan sa Sugbo nga kaigo ang suplay ug walay shortage sa bugas humay ug produktong lana sa probinsya bisan paman nga mulahutay og pipila ka buwan ang krisis sa kagubpt sa Middle East.
Kini ang gipasalig nga pamahayag nga gibuhian ni Cebu Provincial Governor Pamela “Pam” Baricuatro atol sa pakighinabi niini sa mga sakop sa tigbalita niadtong Miyerkules, Marso 4 sa Governor’s Office sa Capitol Compound.
Matod pa sa gobernadora nga base sa datos gikan sa Department of Agriculture (DA) nga nagkumpirmar sa stable nga suplay ang anaa sa probinsya. Apan wala niini gilimod ang mga taho nga adunay mireklamo sa Kapitolyo kabahin sa pipila ka mga private retailers ang nanghimulos sa kahigayunan og nagpasaka sa ilang presyo.
Asoy ni Gov. Baricuatro nga wala pay igong sukaranan nga magpatuman sa price control measures apan nagpasidaan kini nga ang Kapitolyo naniid na batok profiteering.
Kahinumduman nga kaniadtong Lunes, Marso 2 kay mipirma ang gobernadora sa Executive Order No. 15 sa pagmando sa hinadali ug proactive nga mga lakang aron ma-mitigate ang sektor sa ekonomiya, enerhiya, seguridad sa pagkaon, kaluwasan sa publiko, ug welfare sa posibleng epekto sa krisis sa Middle East diri sa Sugbo.
