CEBU CITY- Gipasaka ni kanhi senador Antonio Trillanes IV ang nagkadaiyang criminal cases batok sa pipila ka personalidad ug sa giingong 18 ka kanhi sundalo o ex-marines, human siya akusahan nga midawat kuno og 2 milyong dolyar nga suhol alang sa operasyon sa International Criminal Court o ICC—akusasyon nga iyang giingong walay kamatuoran ug makadaot sa iyang pangalan.
Sa interview sa Bombo Radyo Cebu, matud ni Trillanes, lakip sa iyang gisang-at ang cyber libel cases batok nila Atty. Levi Baligod, Mike Defensor, Jay Sonza ug Lorraine Badoy, ug si Lorraine Badoy, human sa giingong pagpakaylap og sayop nga impormasyon batok kaniya.
Gawas niini, nagsang-at usab si Trillanes og kasong perjury batok sa 18 ka kanhi sundalo, kinsa maoy nag-akusa nga midawat siya og maong kantidad nga suhol.
Gipasiugda ni Trillanes nga walay kamatuoran ang alegasyon ug gihimo lamang kini aron dauton ang iyang pangalan.
Dugang pa niya, bisan og adunay pipila sa mga nag-akusa, klaro na nga wala silay direktang ebidensiya sa ilang pahayag, hinungdan nga dili niya bawi-on ang mga kasong iyang gisang-at aron mapanubag ang mga responsable ug malikayan nga mausab ang susamang akusasyon.
Samtang, giingon usab ni Trillanes nga adunay mga obserbasyon nga posibleng politically motivated ang paglutaw sa maong mga alegasyon, ilabi na sa nagpadayong mga isyu nga may kalabutan sa imbestigasyon sa International Criminal Court batok kang kanhi Pangulong Rodrigo Duterte ug sa mga isyu nga giatubang ni Bise Presidente Sara Duterte.
