Wala mahisguti ang nagpadayon nga panagbangi sa Middle East atol sa usa ka meeting tali ni President Ferdinand “Bongbong” Marcos Jr. ug US defense officials sa New York, Amerika.
Sumala ni Palace Press Officer ug PCO Undersecretary Claire Castro, ang panagsulti naka-focus sa pagpalig-on sa Philippines–United States defense partnership, lakip ang naka-eskedyul nga mga ehersisyo sa Balikatan ug ang padayon nga pagpatuman sa Mutual Defense Treaty tali sa duha ka nasud.
Nakigkita si Marcos kang US Undersecretary of Defense for Policy Eldridge Colby ug sa iyang delegasyon.
Kung diin ilang gihisgutan ang pagpalig-on sa mga kapabilidad sa duha ka nasud batok sa mga hulga sa rehiyon sa Indo-Pacific ug pagpaayo sa koordinasyon tali sa Armed Forces of the Philippines ug sa militar sa Estados Unidos.
Gipamatud-an pag-usab sa duha ka kilid ang ilang pasalig sa Mutual Defense Treaty aron mapadayon ang kalinaw ug seguridad sa Indo-Pacific.
