Gipasirad-an sa Bureau of Internal Revenue (BIR) ang usa ka dakong online selling operation sa Cebu City human giingong wala kini makadeklarar og kapin sa P211 milyon nga halin.
Sa usa ka pamahayag, ang BIR miingon nga ang closure order gipatuman niadtong Marso 12 ubos sa programang Oplan Kandado.
Ang imbestigasyon gihimo sa Regional Investigation Division of Revenue Region No. 13 – Central Visayas uban sa National Bureau of Investigation – Central Visayas Regional Office (NBI-CEVRO).
Sumala sa BIR, ang operasyon nagsugod human ang mga awtoridad nakadawat og kompidensyal nga impormasyon bahin sa usa ka online seller nga giingong namaligya og mga luhong produkto pinaagi sa Facebook Live ug uban pang digital platforms nga wala nag-isyu og opisyal nga mga resibo ug walay hustong rehistrasyon sa BIR.
Atol sa surveillance ug tax compliance verification, nakita sa mga operatiba nga ang negosyo may kalabutan sa mga lokasyon sa Jamestown ug Mabini Street sa Mandaue City, ingon man sa Barangay Pahina Central sa Cebu City.
Nag-isyu usab ang BIR og mga mission order aron monitoron ang mga kalihokan sa pagbaligya, pamatud-an ang tax compliance, ug pagpahigayon og imbentaryo sa mga taxable nga produkto.
Base sa mga rekord sa negosyo nga nakumpiska atol sa operasyon, daw ang gross sales sa establisemento miabot og kapin sa P211 milyon sumala sa kaugalingong mga rekord sa transaksyon.
Gikan niini, ang negosyo gibanabana nga adunay minimum nga tax liability nga P40.4 milyon, lakip na ang mga surcharge ug multa.
Gipangita pa sa BIR ang indibidwal sa luyo sa operasyon human wala kini motubag sa mga notisya nga gipadala sa ahensya.
