Gipahimangnoan sa Department of Tourism (DOT) Region 7 ang tanang mga turista nga nagplano mobisita sa Central Visayas batok sa nagkadaghang peke nga account sa social media nga nagpakaaron-ingnon nga mga lehitimong hotel, resort, ug travel agency.
Kini nga pasidaan dungan sa paglusad sa kampanya nga “Turista iWAS Scam,” usa ka anti-scam initiative nga gitumong sa pagsumpo sa online booking fraud sa Sugbo ug Bohol, diin ang maong programa gipasiugdahan sa DOT-7 uban sa Police Regional Office 7 (PRO-7) ug sa Cybercrime Investigation and Coordinating Center (CICC) ubos sa Department of Information and Communications Technology (DICT) Region 7 aron modawat og mga reklamo, mokoordinar sa mga operasyon, ug mohatag og suporta sa mga biktima.
Gikumpirma ni Marlon R. Barrientos, ang officer-in-charge division chief sa Tourism Regulations Division sa DOT-7, nga moabot na sa 26 ka accredited nga mga establisyemento ang nireport og 198 ka insidente sa online scam, ug basi sa ilang datos, ang kinatibuk-ang kantidad sa nawala nga kuwarta niabot na sa P1,000,229.80 tungod sa mga malisyosong account sa Facebook ug Instagram nga naggamit sa ngalan sa mga sikat nga destinasyon aron mangilad og bayad sa dili pa moabot ang mga bisita.
Samtang matod ni Gelena N. Asis-Dimpas, ang officer-in-charge regional director sa DOT-7, kining maong mga malimbongong buhat nakahatag og dakong danyos sa pinansyal nga aspeto sa mga bisita, nakabalda sa operasyon sa mga negosyo, ug nakadaot sa kredibilidad sa industriya sa turismo nga dugay na nilang gihagoan og tukod.
Nagsugod kini nga kampanya niadtong 2025 human makadawat og mga report gikan sa Hotel, Resort, and Restaurant Association of Cebu (HRRAC) bahin sa mga peke nga social media pages nga namiktima sa ilang mga miyembro, hinungdan nga nahimo kining usa ka pormal nga inter-agency task force.
Ang maong lakang nagtumong nga mapalambo ang mas luwas nga digital transactions pinaagi sa pag-awhag sa publiko nga i-verify una ang ilang mga reservation ug makig-alayon lamang sa mga opisyal ug lehitimong booking channels sa mga negosyo.
Nagpagawas na usab og advisory ang DOT-7 nga nagmando sa mga accredited establishments nga i-update ang ilang contact details, magpahigayon og cybersecurity awareness seminars, ug mo-monitor sa mga kadudahang aktibidad online.
Giawhag usab ang mga negosyo sa turismo nga klaruhon ang ilang mga opisyal nga booking channels, mentinahon ang ilang mga verified online accounts, ug mogamit lamang og opisyal nga payment channels aron malikayan ang pagbalhin sa kuwarta ngadto sa mga dili awtorisadong account.
Gawas niini, gitambagan ang mga establisyemento nga i-report ang mga duplicate nga pages, magpili og usa ka cybersecurity officer, dumalahon ang ilang Google Maps listings, ug mohatag og saktong impormasyon bahin sa scam awareness ngadto sa ilang mga bisita aron mapanalipdan ang tanan batok sa pagpanikas.
