Gikabutyag ni Engr. Alfredo Quiblat Jr., ang Chief sa PAGASA Visayas Regional Services nga niluwat na og advisory ang DOST-PAGASA kabahin sa opisyal nga pagsugod sa dry season o summer season, ug kini human usab gideklarar sa ahensya nga nawagtang o nahuman na ang amihan.
Dugang ni Quiblat, ang nag-una weather system karon mao ang easterlies ug high pressure area, diin magpadayon kini hangtud pa sa sunod nga mga adlaw.
Mao kini ang gipasabot ni Quiblat atol sa eksklusibong pakighinabi sa Bombo Radyo Cebu newsteam kaniya ug iyang gidugang nga sa duha ka weather system nga iyang gihisgutan, ang easterlies mao ang kasagarang magdala sa init nga panahon tungod kay ang hangin niini gagikan sa Pacific Ocean, samtang ang high pressure area nalambigit kini sa “good weather,” hinungdan nga ubos ra ang tsansa sa pag uwan-uwan.
Dugang gitino ni Quiblat, posibleng moabot sa 44 degree celsius ang heat index, ug ubos na kini sa extreme caution nga nagpasabot, ang long exposure sa direct sunlight posible nang makamugnaw og heat cramps, heat exhaustion ug uban pa.
Ingun man nga posible pa gani nga rason kini sa heat stroke, busa gipahimangnoan niya nga mag maampingon.
