Mipahimangno ang buhatan sa Department of Labor and Employment – Central Visayas (DOLE-7) sa wage matrix alang sa mga adlaw nga holiday karong buwan sa Abril ilabi na karong Semana Santa.
Kini ang gipamahayag ni Roberto Cabardo, ang Information Officer sa DOLE-7 atol sa eksklusibong pakighinabi niini sa Bombo Radyo Cebu News Team niadtong Martes Santo, Marso 31, 2026.
Sumala pa ni Cabardo nga sa Abril 2 (Huwebes Santo) ug Abril 3 (Biyernes Santo) kay usa ka regular holiday sa kalendaryo sa Pilipinas busa ipatuman niini ang double-pay scheme sa mga trabahanteng mutunga sa duty nianang mga adlawa sa ilang inadlaw nga suholan. Lain pa ang pagpuno kung mupanso sila og overtime diin ang ilang suholan kay i-multiply gihapon sa double-pay scheme plus 30% sa matag oras nga gitrabahuan.
Mas dako sab ang makobra sa inadlaw nga suholan sa mga trabahanteng gipatunga sa trabaho sa ilang adlawng tingpahuway (restday) diin gikan sa double-pay scheme ug 30% nga puno sa ilang inadlaw nga suholan.
Apan, exempted ang mga trabahanteng adnay kasabutan tali sa ilang mga employers sa “No Work, No Pay” scheme man o pinaagi sa ilang Collective Bargaining Agreement isip pagtahod sa ilang kasabutan sa empleyado o sa ilang workers’ union.
Samtang ang Abril 4 (Sabado de Gloria) kay gitanyag isip Special Non-Working Holiday diin ang mikinsa nga trabahante ang muduty kay makapanghimulos sa 30% nga puno sa ilang inadlaw nga suholan.
Lain nga regular holiday nga pagaatangan sab kay ang Abril 9 sa musunod nga semana kay ang pagsaulog kini sa nasudnong Araw ng Kagitingan diin sundon ang lagda sa suholan sa maong wage matrix.
Gihangyo sa DOLE-7 ang publiko nga luwas, hapsay, ug himsog ang obserbasyon sa Semana Santa ug uban pang holidays karon buwana sa ingon man sa pagpakatag sa kamahinungdnon sa bili sa panahon sa kwaresma diri sa atoang rehiyon sa Central Visayas.
