Nameligro nga malangan ang gikatakdang peace talks sa Pakistan human gipasiugda sa Iran nga kinahanglan matuman ang mga kondisyon niini sa dili pa mosugod ang negosasyon sa Estados Unidos.
Sumala sa Iranian Parliament Speaker Mohammad Baqer Qalibaf, kinahanglan una nga ma-unblock ang Iranian assets ug matukod ang usa ka hingpit nga ceasefire sa Lebanon sa dili pa pormal nga magsugod ang mga panaghisgot.
Gibarugan niini, nga giingong nauyonan na kini sa Washington, apan ang aktuwal nga negosasyon dili pa mosugod hangtod matuman ang maong mga kondisyon.
Sa bahin sa Estados Unidos, bisan wala pa’y pahayag ang White House, miingon si President Donald Trump sa usa ka interbyu sa New York Post nga andam ang Amerika sa pagpadayon sa mga operasyon militar kung mapakyas ang peace talks.
Gidugang usab ni Trump nga naka-standby ang mga barkong iggugubat sa Estados Unidos kung dili molampos ang negosasyon.
Samtang, gibarugan sa bag-ong Supreme Leader sa Iran, si Ayatollah Mojtaba Khamenei, nga ang iyang nasud mangayo og bayad alang sa kadaot nga gipahinabo sa gubat ug nanawagan nga kadtong mga miatake sa ilang teritoryo manubag.
