Pormal na nga gikumpirmar sa usa sa mga saksi sa hearing sa Kamara nga nakadawat siya og direktiba gikan kang Bise Presidente Sara Duterte alang sa giingong paghatud niadtong Disyembre 2022, nga may kalabotan sa kontrobersyal nga paggamit sa P125 milyon nga confidential funds.
Atol sa pagpangutana ni Lanao del Sur 1st District Representative Zia Adiong, ang saksi nga si Mr. Ramil Madriaga gipailalom sa mga pangutana sa pagklaro sa mga detalye nga anaa sa iyang gisumiter nga affidavit ug supplemental affidavit.
Diin ang interogasyon nakasentro sa usa ka reklamo bahin sa kwestyonableng paggamit sa pondo sa gobyerno.
Direktang gipangutana ni Rep. Adiong si Madriaga kung tinuod ba ang giingon sa iyang pahayag nga nakadawat siya og tawag gikan sa Bise Presidente niadtong Disyembre 20, 2022 aron mohatag og direktiba.
Ang saksi mitubag og tinuod ug gikumpirmar ang eksaktong pahayag nga giingong gihimo ni VP Duterte.
Sa pikas bahin, gikumpirmar usab ni Madriaga nga personal nga gibisita siya ni Bise Presidente Sara Duterte sa iyang detention cell niadtong Oktubre 2025.
Kini bisan pa sa pamahayag ni VP Sara nga wala siyay personal o propesyonal nga relasyon kang Madriaga.
Sa iyang sinumpaang pahayag, si Madriaga miingon nga nakita niya si Duterte samtang gidala siya sa opisina sa jail warden sa Camp Bagong Diwa, Taguig, diin giingong mipahiyom ug mikaway kini kaniya.
Sumala ni Madriaga, nakigsulti siya kang Duterte sa telepono, kinsa nangutana bahin sa iyang kahimtang ug giingong nangayo og pasaylo sa wala pagtabang sa iyang kaso.
Gibutyag usab ni Madriaga nga gibati niya ang kasagmuyo, labi na sa dihang giakusahan siya ni Harry Roque nga nagpasaka og kaso sa pagkidnap batok kaniya isip panimalos sa giingong pagbutyag sa pagpangilog og yuta sa Bataan.
Giinsistir ni Madriaga nga ang insidente usa ka pruweba nga siya adunay direktang relasyon kang Duterte, sukwahi sa iyang miaging pamahayag.
