Subsob na ang pagpangandam sa Kagamhanan sa dakbayan sa Mandue, alang sa umaabot nga 48th ASEAN Leaders’ Summit sa buwan sa Mayo 8-9, 2026 nga ipahigayon sa Sugbo.
Matud ni Atty. Sally Malig-on, ang City Administrator sa Mandaue nga nangandam na ang kagamhanan alang sa umaabot nga kalihokan nga laumang tambungan sa mga importanteng mga indibidwal og lideres sa nagkadaiyang nasud sa Asya.
Sigon niini nga nagpatapok na si Mandaue City Mayor Thadeo “Jonkie” Ouano, sa mga nagkalain-laing barangay aron pagmando sa pagpalimpyo sa mga lugar nga posibleng latasan sa mga delegado.
Lakip sa mga lakang nga ilang ipatuman mao ang pagpalimpyo sa mga “graffiti” o ang mga hugaw-hugaw nga bandal sa kadalanan.
Nakig-alayon na usab ang kagamhanan sa dakbayan sa Mandaue sa buhatan sa Department of Works and Highways, alang sa pagpataud og mga poste ug suga sa mga ngit-ngit nga kadalanan ug tay-tayan nga walay suga.
Samtang sa bahin usab sa seguridad aduna nay gibuhat nga mga lakang ang Mandaue City Police Office, alang sa hingpit nga pagbantay sa siguridad sa adlaw sa kalihokan.
Gihimug-atan ni Malig-on nga tumong sa kagamhanan sa Mandaue, nga mahimong luwas, hapsay og mag-malinawon inig abut sa mga delegado sa ASEAN Summit.
