Nagpagawas ang Commission on Audit (COA) og bag-ong notice of disallowance (ND) kabahin sa confidential funds sa Office of the Vice President (OVP), nga mokabat sa P300 milyon, matod ni House Committee on Public Accounts Chairperson Terry Ridon.
Sumala ni Ridon, ang bag-ong ND lahi sa miaging desisyon sa COA nga nagkumpirmar sa disallowance sa P73 milyon nga confidential funds nga giingong gigamit sa OVP gikan sa Disyembre 21 hangtod 31, 2022.
Gipasabot sa Kongresista nga ang miaging P73 milyon nga disallowance adunay final ruling ug mahimong makaabot sa Korte Suprema, samtang ang bag-ong P300 milyon anaa pa sa audit review ug wala pa ma-finalize.
Dugang usab ni Ridon, ang ND nagpasiugda sa posibleng mas lapad nga isyu sa paggamit sa confidential funds sa OVP, nga gikataho nga padayon nga gisusi sa mga awtoridad.
Samtang, ang House justice panel nagpadayon sa pagdungog sa mga reklamo sa impeachment batok kang Bise Presidente Sara Duterte, nga naglakip sa mga alegasyon sa giingong sayop nga paggamit sa P612.5 milyon nga confidential funds, mga hulga batok sa Presidente ug sa iyang pamilya, ug giingong wala mapasabot nga bahandi.
Mahinumduman nga si VP Sara wala mitambong sa miaging mga hearing niadtong Marso 25 ug Abril 14, samtang ang imbestigasyon sa nagkalain-laing ahensya, lakip ang National Bureau of Investigation (NBI), nagpadayon, nga nag-ingon nga adunay usab giingong mga iregularidad sa pipila ka mga pirma sa mga dokumento nga may kalabotan sa confidential funds.
