CEBU CITY- Gikonsiderar sa usa ka abogado sa National Union of People’s Lawyers–Cebu nga usa ka dakong abante sa pakigbisog alang sa hustisya ang padayong pag-uswag sa kaso ni kanhi Pangulong Rodrigo Duterte sa International Criminal Court.
Sa eksklusibong pakighinabi sa Bombo Radyo Cebu, gibutyag ni Atty. Noemi Truya-Abarientos,National Union of People’s Lawyers–Cebu nga ang confirmation of charges maoy kritikal nga yugto nga magtino kon adunay igo nga basehan aron ang kaso mosulod sa pormal nga paghusay.
Alang sa mga pamilya sa mga biktima sa extrajudicial killings sa Cebu, giingon sa abogado nga ang maong kalamboan nagrepresentar og kusog nga timaan nga ang ilang dugay nang gipangandoy nga hustisya nagkaduol na.
Apan bisan pa sa maong paglaum, gipasiugda niya nga dili pa kini angayng selebrar sa hingpit. Matud niya, ang tinuod nga kadaugan alang sa mga biktima maangkon lamang kon adunay pinal nga conviction.
Sa isyu sa interim release ni Duterte, gipasabot ni Truya-Abarientos nga kabahin kini sa due process sa usa ka akusado. Bisan pa niini, tungod sa kabug-at sa mga alegasyon ug base sa nangaging mga desisyon, giingon niya nga ubos ang posibilidad nga kini hatagan og pagtugot.
Gidugang pa sa abogado nga ang International Criminal Court nahimong alternatibong dalan sa hustisya alang sa mga biktima, ilabi na sa mga higayon nga makita ang kakulangan sa lokal nga mekanismo sa pagtagad sa maong mga kaso.
Sa katapusan, nanawagan siya sa mga biktima ug ilang mga pamilya nga magpabiling lig-on ug ipadayon ang pagsalig sa legal nga proseso samtang naghulat sa sunod nga yugto sa pangkalibutanong husay.
