Nangandam na si Atty. Manases Carpio, asawa ni Bise Presidente Sara Duterte sa pagpasaka og kasong criminal batok sa pipila ka mga opisyal sa Bangko Sentral ng Pilipinas (BSP), Anti-Money Laundering Council (AMLC), ug pipila ka mga kongresista sa Quezon City Prosecutor’s Office karong adlawa, Abril 27.
Lakip sa mga pasakaan og kaso mao sila si BSP Governor Eli Remolona Jr., AMLC Executive Director Ronel Buenaventura, ug pipila ka mga miyembro sa House sama nila ni House Committee on Justice Chair Gerville Luistro, Percival Cendaña, Chel Diokno sa Akbayan Party-List, ug Mamamayang Liberal Party-List Leila de Lima.
Kini giingong gibasi sa mga paglapas sa Anti-Money Laundering Act, Bank Secrecy Law, ug Data Privacy Act tungod sa giingong pagpagawas sa mga sensitibo nga rekord sa bangko.
Ingon man na human kini sa report sa AMLC ngadto sa House of Representatives nga adunay dul-an P6.77 bilyon nga “kadudahan” ug “natabunan” nga mga transaksyon nga nalambigit kang Bise Presidente Sara Duterte ug Carpio sa miaging duha ka dekada.
Sumala sa AMLC, lakip niini ang bilyon nga migawas ug misulod sa ilang mga account, samtang adunay mga bahin nga dili mamatikdan sa daang sistema.
Giinsistir ni Carpio nga ang giingong pagpagawas sa mga rekord ilegal ug giingong gigamit alang sa “black propaganda” batok sa pamilyang Duterte, labi na sa taliwala sa mga isyu sa politika ug mga proseso sa impeachment.
Matod niya nga ang mga rekord sa bangko gipanalipdan sa balaod ug dili angay ibutyag.
Hugot nga gihimakak sa daghang mga magbabalaod ang pasangil. Sumala nila ni De Lima ug Cendaña, ang impeachment hearing naa sa hurisdiksyon sa House ug dili paglapas sa mga balaod sa bank secrecy.
Giinsistir nila nga kini kabahin sa proseso sa accountability ug adunay legal nga basehan sa paghisgot sa mga transaksyon sa pinansyal kung adunay isyu sa posibleng mga anomaliya.
Samtang, daghang mga opisyal sa Ubos Balay Balauranan sa Kongreso ang mipasiugda nga ang reklamo mismo dili usa ka paglimod nga ang mga rekord sa pinansyal nga nakita sa AMLC dili tinuod apan nagpunting lamang sa isyu sa pagpagawas sa impormasyon.
