Nisaka sa pinakabag-ong ranggo ang Filipina tennis star nga si Alex Eala sa Women’s Tennis Association (WTA) human sa iyang kampanya sa Madrid Open.
Gikan sa No. 44, misaka si Eala ngadto sa No. 42 sa singles rankings human makaabot sa ikaduhang hugna sa torneyo, diin nakadugang siya og 35 puntos alang sa kinatibuk-ang 1,285 puntos.
Sa maong kampanya, gipildi ni Eala si Anastasia Pavlyuchenkova sa unang hugna sa iskor nga 6-3, 6-3, sa wala pa siya mapildi ni Elise Mertens sa ikaduhang hugna, 2-6, 1-6.
Sa doubles, nakig-partner si Eala kang Zeynep Sonmez ug nakaabot sa ikaduhang hugna. Gipildi nila si Chan Hao-ching ug si Fanny Stollar sa unang hugna, 6-2, 6-2, apan napildi sila nila Katerina Siniakova ug Taylor Townsend sa ikaduhang hugna, 1-6, 5-7.
Tungod sa iyang maayong performance, nakakuha si Eala og 120 puntos sa doubles nga nakapaangat kaniya sa career-high nga No. 88 sa rankings gikan sa miaging No. 99.
Sa pagkakaron, anaa si Eala sa Roma aron mangandam sa iyang pag-apil sa Italian Open.
