CEBU, PHILIPPINES- Gipasiugda ni Department of Trade and Industry (DTI) Undersecretary Allan Gepty nga dako ang papel sa ASEAN sa pagpalig-on sa ekonomiya sa rehiyon, ilabina sa tunga-tunga sa nagpadayon nga global nga krisis.
Sa press briefing alang sa ika-48 nga ASEAN Summit sa International Media Center (IMC) sa Dakbayan sa Lapu-Lapu karong Mayo 6, 2026, giingon ni Gepty nga ang panaghiusa ug kooperasyon sa mga miyembro nga nasod mao ang nagpalig-on sa ekonomiya sa Southeast Asia.
Gipasalamatan usab niya ang media sa padayon nga suporta sa paghatod sa tukmang impormasyon ngadto sa publiko, ingon man ang Cebu sa mainitong pagdawat sa mga delegado sa summit.
Giingon sa opisyal nga simboliko ang pagpili sa Cebu isip host venue tungod kay dugay na kining giila nga sentro sa patigayon ug koneksyon sa rehiyon. Matod pa niya, ang ngalan nga “Cebu” nagpasabot og trade, nga nagpakita sa tumong sa ASEAN nga palig-onon ang integrasyon sa ekonomiya sa Southeast Asia.
Gibutyag usab ni Gepty nga ang kalibutan nag-atubang sa nagkalain-laing hagit, lakip ang tensyon sa Middle East nga nakaapekto sa supply chain, enerhiya, ug presyo sa mga palaliton.
Bisan pa niini, gipasiugda niya nga ang kusog sa ASEAN naggikan sa panaghiusa ug kooperasyon, diin ang mga nasod nagtinabangay aron mapadayon ang libre ug hapsay nga daloy sa patigayon, mapalig-on ang kumpiyansa sa mga investors, ug malikayan ang dili kinahanglan nga mga restriksyon.
Gipunting usab niya ang mga benepisyo sa ASEAN integration sa mga mag-uuma, negosyo, ug mga trabahante, lakip ang mas lapad nga merkado, dugang oportunidad sa trabaho, ug mas sayon nga pagbiyahe ug pagnegosyo sa tibuok rehiyon.
Giduso usab ang mas lig-on nga kooperasyon sa ASEAN sa mga sektor sa energy security, food security, logistics, ug supply chain resilience.
Alang sa Pilipinas, ilabina sa Cebu isip logistics hub, giila kini nga oportunidad aron mapalig-on ang papel sa nasud isip gateway sa kalakalan ug serbisyo sa rehiyon.
Gipunting usab nga ang chairmanship sa Pilipinas karong tuiga adunay dakong papel sa paghulma sa economic direction sa ASEAN, lakip ang pagpalambo sa renewable energy, digital trade, agrikultura, ug free trade agreements.
