-Nag-session nga walay kuryente ang Sangguniang Kabataan Council sa Barangay Labangon niadtong Huwebes, Mayo 7, 2026, kini human nga giingung wala nakapataod ang konseho og tinubdan sa kuryente.
Apan ang maong session, gipahigayon aron pagklaro sa mga isyu nga mitumaw sa SK labangon hilabi na sa hisgutanan sa giingung kuwestiyonableng pundo ug walay klarong pagpatuman sa mga programa.
Gibutyag ni Inday Josa Osmeña, konstituwente ug advocate sa Good Governance, nga angayang manubag ang Sangguniang Kabataan Chairman sa Barangay Labangon, nga si Kim Kyle Buendia, gumikan sa mga kuwestiyonableng pundo sa ilang administrasyon og kakuwang sa pagpakabana sa pagpahibalo sa mga kabatan-onan sa nahisgutang barangay.
Matud ni Osmeña, nga angayang manubag si Buendia, gumikan kay adunay katungod ang katawhan hilabi na ang mga kabatan-onan sa Brgy. Labangon nga mahibalo sa estado sa pundo, hinungdan nga gipangayo niini ang Statement of Accounts aron masuta kung aduna ba’y mga iregularidad sa paggasto sa pundo alang sa katawhan.
Gikuwestiyon usab niini ang pagpatuman og mga programa nga walay napormang Annual Barangay Youth Investment Program (ABYIP) usa ka dokumento nga nagpakita sa mga plano, proyekto, programa o aktibidadis nga ipatuman sa konseho sulod sa fiscal year.
Lakip nga gikuwestiyon niini ang wala pagrelease sa mga liquidation nga nagasto sa tuig 2024-2025, hinungdan nga gihimug-atan niini nga dili gayud kinahanglang pirmahan sa konseho ang mga budget proposal hangtod sa walay mapakita nga statement of accounts.
Giklaro usab ni Osmeña, nga ang iyang gibuhat walay sagul pamolitika gumikan kay ang iyang tumong ug tuyo mao ang pagpanubag sa mga iregularidad sa pundo ug walay klarong pagpatuman sa mga programa, hinungdan iyaha usab gilimod ang mga pasangil nga usa siya ka binayran.
Gihagit usab ni Inday Josa Osmeña, ang tibouk konseho sa SK Labangon nga makigdebate sa publiko aron klaruhon ang mga isyu.
Samtang sa pikas bahin, mopasaka usab og kaso si Osmeña batok sa SK Chairman nga si Kim Buendia og pipila ka mga konsehales niini sa buhatan Ombudsman aron panubagon sa maong isyu.
Kahinumdoman nga mitumaw ang pangalan ni Kim Kyle Buendia, niadtong nakalabayng buwan sa Enero, gumikan sa alegasyon sa paglarga niini alang sa personal nga lakaw sa Thailand nga walay klarong pagpatuman sa mga programa ug aktibidadis alang sa mga kabatan-onan sa Barangay Labangon.
