CEBU CITY- Nadakpan na sa kapulisan sa Cebu City Police Office-Labangon Police Station ang duha ka suspetsadong gitudlong mipusil sa usa ka 63-anyos nga lab-asera samtang nagbiyahe padulong sa Pasil Fish Market sa Tres de Abril Street, Barangay Labangon, Cebu City kagahapon sa buntag.
Ang mga nadakpan giila lamang sa mga alyas nga “Francis,” 38 anyos, nga giingong gunman, ug iyang pag-umangkon nga si “Ricky,” 21 anyos, nga maoy nagmaneho sa motorsiklo atol sa insidente.
Samtang, ang biktima giila nga si Elena Bascon, 63 anyos, taga-Buhisan, nga padulong unta sa Pasil Fish Market sakay og habal-habal pasado alas 5 sa buntag niadtong Mayo 15, 2026.
Base sa inisyal nga imbestigasyon sa Labangon Police Station ubos sa pagpangulo ni PCAPT Joel Dela Cerna, giingong giatngan sa mga suspetsado ang biktima samtang nagasubay kini sa iyang naandang rota padulong sa merkado.
Sa pag-abot sa biktima sa Tres de Abril Street duol sa Cebu Institute of Technology-University, nakita sa mga suspetsado ang higayon ug gipusil kini makausa, nga miigo sa liog sa biktima.
Human sa pagpamusil, dali nga misibat ang mga suspetsado gamit ang orange nga Mio Soul nga motorsiklo. Apan, wala molapas og usa ka adlaw, nasikop sa kapulisan ang drayber nga si “Ricky,” ug nasundan dayon og dakop ang gunman nga si “Francis” pinaagi sa hot pursuit operations.
Sa pagpalawom sa imbestigasyon, nasuta sa kapulisan nga gidudahang asset sa pulisya ang biktima.
Gitudlo usab sa suspetsadong si “Francis” nga si Bascon kuno ang nireport sa iyang giingong pagpayuhot og ilegal nga droga, nga miresulta sa una niyang pagkadakop.
Dugang pa, nasayran nga adunay daan nga kaso sa frustrated murder si “Francis” ug nakagawas kini kaniadto pinaagi sa piyansa.
Matod ni PCOL George Ylanan, City Director sa CCPO, dako ang natabang sa high-quality CCTV footage sa pag-ila sa mga suspetsado pinaagi sa ilang gigamit nga motorsiklo ug gisul-ob nga mga sinina.
Kasong frustrated murder ang giandam batok sa magtiyo nga suspetsado, nga kasamtangang gitanggong sa Labangon Police Station.
Samtang, ang biktima nga si Bascon padayon pang gintambalan sa Cebu City Medical Center ug gikatahong anaa na sa stable nga kahimtang.|With reports of Bombo Rexmond Omega
