CEBU CITY- Dili na kuhaon sa iyang kabanay ang patayng lawas sa usa ka Sugboanong giingong sakop sa New People’s Army (NPA) nga nakalas sa usa ka engkwentro batok sa mga tropa sa gobyerno sa Cauayan, Negros Occidental.
Kini ang gipahibalo sa National Task Force to End Local Communist Armed Conflict (NTF-ELCAC) subay sa kamatayon ni Vince Francis Dingding, kinsa nailang kanhi lider sa estudyante sa University of the Philippines (UP) Cebu ug lumad nga taga-Cebu City. Si Dingding usa sa lima ka gidudahang rebelde nga napatay sa maong engkwentro.
Sa usa ka opisyal nga pamahayag, gihulagway sa NTF-ELCAC ang desisyon sa pamilya isip usa ka “makapasubo nga pahinumdom” sa pagkaguba sa mga pamilyang Pilipino ug sa bug-at nga emosyonal nga palas-anon nga gidala sa mga kabanay tungod sa armadong pakigbisog sa Communist Party of the Philippines-NPA-National Democratic Front (CPP-NPA-NDF).
Gikutlo sa task force ang usa ka sinulat gikan sa mga ginikanan ni Dingding nga sila si Romulo ug Rica, nga gipetsahan og Mayo 18. Sa maong sulat, nihangyo ang mga ginikanan nga i-coordinate na lang pinaagi sa ilang kapitan sa barangay ang tanang kalihukan bahin sa ilang anak.
Gipasiugda usab sa ahensya ang postscript (P.S.) sa sulat diin direktang giingon sa mga ginikanan: We decided that we will no longer claim his remains in Negros Occ.”
Nasayran dugang sa sulat nga ang inahan ni Dingding kasamtangang nakigbisog batok sa colon cancer ug gitambagan sa mga doktor nga likayan ang bisan unsang stress samtang nagpaalim.
Subay sa monitoring sa NTF-ELCAC, si Dingding nagsilbi nga student leader sa UP Cebu gikan sa 2014 hangtod 2015 ug aktibo sa aktibismo sa kabatan-onan sa wala pa hingpit nga misulod sa underground nga armadong kalihukan niadtong 2017.
Didto sa Negros, gikatahong migunit na kini og mga taas nga katungdanan sa politika ug organisasyon sulod sa mga yunit sa NPA.
Dugang sa task force, dili kini ang unang higayon nga adunay mga aktibistang batan-on nga mianib sa armadong grupo, nga sa katapusan miresulta sa pagkaguba sa relasyon sa pamilya ug grabeng pag-antos sa mga kabanay nga mabiyaan.
Sa pagsuwat niining balitaa, wala pay pormal nga pamahayag o reaksyon ang CPP-NPA-NDF kalabot sa maong insidente.
