Nakatala ang Department of Health (DOH) og kapin 4,600 ka bag-ong kaso sa human immunodeficiency virus (HIV) sa Pilipinas sulod sa unang tulo ka bulan sa 2026.
Base sa pinakabag-ong datos gikan sa HIV and AIDS Surveillance of the Philippines, adunay kinatibuk-ang 4,633 ka bag-ong HIV cases nga natala gikan Enero hangtod Marso karong tuiga, siyam ka porsyento nga mas taas kumpara sa parehas nga panahon sa 2025.
Matud sa DOH, anaa sa 1,104 o 24 porsyento sa mga bag-ong kaso ang anaa na sa advanced HIV stage sa dihang nadayagnos.
Kun diin, usa ka average nga 51 ka kaso matag adlaw ang natala atol sa maong quarter. Kini 11 porsyento nga mas ubos kumpara sa 57 ka adlaw-adlaw nga kaso nga natala sa samang panahon niadtong 2025.
Samtang, ang average nga binulan nga kaso mikabat sa 1,544, nga siyam ka porsyento usab nga mas ubos kumpara sa 1,693 ka kaso kada bulan sa miaging tuig.
Ang pinakadaghang bag-ong kaso natala sa National Capital Region nga adunay 989 ka impeksyon, gisundan sa Calabarzon nga adunay 808, Central Luzon nga adunay 551, Soccsksargen nga adunay 277, ug Davao Region nga adunay 263 ka kaso.
Sumala sa DOH, kining lima ka rehiyon naglangkob sa 62 porsyento o 2,888 sa tanang bag-ong kaso sa nasud atol sa maong panahon.
Kadaghanan sa mga bag-ong natakdan mga lalaki, diin 4,381 ang lalaki ug 252 ang babaye.
Base usab sa National HIV Care Cascade hangtod Marso 2026, gibanabana nga adunay 288,000 ka mga tawo nga nagpuyo nga adunay HIV sa Pilipinas.
Apan, 55 porsyento lamang o 157,350 kanila ang nakumpirma nga nadayagnos pinaagi sa laboratory testing.
