Personal nga gibisita ni Armed Forces of the Philippines (AFP) Chief of Staff General Romeo S. Brawner Jr. ang lubnganan sa duha ka piloto sa Philippine Air Force (PAF) nga namatay sa usa ka air crash sa Tuba, Benguet.
Ang mga patayng lawas sa duha ka piloto kasamtangang gilubong sa Philippine Air Force Mortuary sa Colonel Jesus Villamor Air Base (CJVAB), diin personal nga gipaabot ni Brawner ang iyang pahasubo sa mga nagbangotan nga pamilya.
Gihatagan sa AFP Chief og pasidungog ang mga patayng lawas nila ni First Lieutenant Ruth Angelique Pasos PAF ug Second Lieutenant Cherky Embudo PAF, isip pag-ila sa ilang dedikasyon, kaisog, ug matinud-anon nga pagserbisyo sa nasud.
Sumala sa report sa AFP, namatay ang duha ka sundalo samtang nagpahigayon og Military Pilot Training flight niadtong Mayo 20, 2026.
Atol sa iyang pagbisita, gipaabot usab ni Brawner ang panaghiusa ug suporta sa tibuok armadong kusog ngadto sa mga nagbangotan nga pamilya taliwala niining lisod nga pagsulay.
Ang tibuok AFP nagpahayag sa ilang pahasubo sa pagkawala sa mga piloto, ug midugang nga ang ilang kaisog ug sakripisyo sa ngalan sa katungdanan magpabilin nga usa ka testamento sa propesyonalismo ug pasalig sa mga Pilipinong aviator sa pagpanalipod sa nasud ug sa katawhan niini.
