Nalingaw ang mga netizens sa talagsaong kinaiya sa usa ka farm goat nga gihinganlan og “Billy Goat” human kini nakita nga nag-huyop og kalayo sama sa gibuhat sa mga tawo aron nga makaluto og pagkaon
Sa video, makita si Billy Goat nga maampingong naghuyop sa lutoan gamit ang hangin sa iyahang baba. Sumala sa tag-iya, si Billy Goat usa ka bihuhing kanding nga gipadako sa ilang caretaker nga si Bobong kauban sa mga iro sa umahan.
Matud pa nila, gawas sa sagbot, ganahan usab mokaon si Billy Goat og kan-on ug kasagaran mosunod sa gibuhat sa mga iro nga iyang kauban sukad gamay pa kini.
Tungod sa iyang pagdako uban sa mga iro, giingong nagtuo na usab si Billy Goat nga usa siya kanila. Dili usab kini kasagaran moduol o mokuyog sa ubang mga kanding.
Nakatawa na lang ang mga netizens sa komentaryo sa tag-iya nga daw kinahanglan na nila ipa-atubang si Billy Goat sa samin aron mahibal-an nga kanding diay siya ug dili iro.
Daghan usab ang nalingaw ug niingon nga si Billy Goat usa ka “certified doggo trapped in a goat’s body,” samtang ang uban miingon nga klaro kaayo nga naapektohan kini sa iyang environment ug mga kauban sa pagdako.
Bisan pa man, nahimong instant good vibes sa social media si Billy Goat tungod sa iyang kataw-anan apan makahigugmang kinaiya.
