Gihagit ni Atty. Dino De Leon, usa ka human rights lawyer, si Senador Alan Peter Cayetano nga magdala og 13 ka “warm bodies” o pisikal nga motambong nga mga senador sa sesyon sa Lunes, Hunyo 8.
Matod pa ni De Leon, ang maong lakang magpamatood kung si Cayetano ba gihapon ang naghupot sa mayoriya ug adunay lehitimong gahum isip Presidente sa Senado.
Gihimo sa abogado ang maong hagit human sa mainit nga panaglalis bahin sa liderato sa Senado.
Ang kampo ni Cayetano nagpadayon sa pag-angkon nga siya ang pangulo sa institusyon, bisan pa sa giingong opisyal nga deklarasyon sa quorum sa karibal nga grupo nga gipangulohan ni Senador Sherwin Gatchalian.
Sumala pa sa abogado, andam sila nga mohilom ug moatras kung makapakita si Cayetano og 13 ka senador nga personal nga motambong sa plenaryo.
Apan kung napulo lamang ka miyembro ang iyang mahatag, prangka nga gisaway ni De Leon ang senador ug gipangutana kung asa niya gikuha ang kabaga sa iyahang nawong sa pag-ingon nga siya gihapon ang Presidente sa Senado.
