Uyon ang human rights lawyer sa gipagawas nga opinyon sa tulo ka kanhi Chief Justices bahin sa 2/3 vote requirement sa Senado.
Matud ni human rights lawyer ug kanhi Bayan Muna Party-list Representative nga si Atty. Neri Colmenares nga dili “static” o nakapirmi ang maong balaod ug mahimong mausab ang kinahanglanong gidaghanon sa boto depende sa ihap sa mga miyembro sa Senado nga mosalmot o molingkod isip kabahin sa impeachment court.
Gipasabot ni Colmenares nga walay gipahayag sa Konstitusyon nga ang basihan sa pag-ihap kinahanglan ba nga mga present o apil ba ang mga absent. Tungod kay wala kini gihan-ay daan sa Batakang Balaod, busa abli kini sa paggawas nga interpretasyon kung unsa gayud ang tinuod nga gipasabot sa two-thirds requirement.
Dugang niini nga kon pananglitan mokunhod ngadto sa 20 o 21 na lamang ang nahatungdan nga mga senador, kinahanglan usab nga mkunhod o mo-adjust ang gikinahanglang 2/3 nga boto basi sa kasamtangang gidaghanon sa mga miyembro sa impeachment court.
Samtang, gipasabot usab ni Atty. Inocencio Dela Cerna, ang kanhi Legal Counsel sa Criminal Investigation and Detection Group -7, nga kinahanglan nga magiyahan gihapon ang tanan sa probisyon nga nakatala sa Konstitusyon bahin sa gikinahanglang 2/3 nga boto sa mga senador.
Basi sa kasamtangang probisyon sa balaod, ang maong threshold kinahanglang i-basi sa kinatibuk-ang gidaghanon nga 24 ka sakop sa Senado.
Dugang pa ni Dela Cerna, wala gipatin-aw sa Konstitusyon ang mga sitwasyon kung asa ang usa ka senador nga wala physically, mi-resign, o natangtang sa iyang posisyon.
Matud niya, kung anaa pa unta’y probisyon alang sa mga absente o natangtang nga senador, mahimo untang mo-depende ang kinahanglang boto sa gidaghanon sa mga present.
Apan tungod kay wala kini nakasulat, ang basihan sa boto—bisan bahin sa pagpabalik/reconstitution, conviction, acquittal, o clearance sa Bise Presidente—magpabilin nga nakabasi gihapon kini sa 24 ka senador.
