Midagsa ang mga ginikanan kagahapong adlawa, Dominggo June 7, 2026 sa Downtown Cebu, aron sa last minute nga pagpamalit og school supplies alang sa pagbukas sa klase karong adlawa.
Gikahinabi sa Bombo Radyo Cebu ang pipila sa mga tindero sa mga school supplies sa sa Magallanes Street. diin gibutyag ni Virgillo Tabal, nga inanay na nga midagsa ang mga mamalitay sa school supplies gumikan sa pag-abli sa klase.
Dugang niini nga mapasalamaton siya nga ubay-ubay na siya og nahalin taliwala sa kalisod sa mga tawo og padayung nasinati nga krisis sa kalibutan, apan sigon ni Tabal nga wala ra usab kini nakaapekto sa presyo.
Samtang sa pikas bahin, gikuha usab sa Bombo Radyo ang habig sa usa ka konsumidor nga si Aileen Gargoles, nga matud pa namatikdan niini ang epekto sa krisis gumikan kay adunay pipila ka mga school supplies ang misaka ang presyo.
Samtang, nagpagawas ang Department of Trade and Industry (DTI) sa ilang “Gabay sa Pamilya ng School Supplies” o School Supplies Price Guide alang sa S.Y. 2026–2027 aron matabangan ang mga konsumidor sa paghimo og mga desisyon nga may kahibalo sa dili pa ang pag-abli sa klase.
Sumala sa DTI, ang giya naghatag og lain-laing mga presyo sa kasagarang gigamit nga mga gamit sa eskwelahan, nga nagtugot sa mga ginikanan ug mga estudyante sa pagtandi sa mga produkto ug pagpangita og mga kapilian nga mohaom sa ilang badyet.
Mahimong i-download sa mga konsumidor ang pinakabag-ong “Gabay sa Pamilya ng School Supplies” pinaagi sa website sa DTI o pinaagi sa pagbisita sa opisyal nga mga social media pages sa DTI Philippines ug DTI Consumer Care.
